يا كاتب التاريخ

........ يا كاتب التاريخ ........ يا كاتب التاريخ 136

يا كاتب التاريخ

ما اهتزوا كفينك

ما رمشت عينك

يا كاتب التاريخ

خبرني شو دينك

يا كاتب التاريخ رحماك يا عمي

عم تكتب بعتمة

يبقى السطر تلطيخ

وتحط له معنى

وكيف القلم ما يدور

بتقول عنها سطور

إنت اللي بتعرف

وانت اللي بتسمي

الشخبطة كلمة

والخرفنة مخرف

يا سيد الحكمة

يا حارس المتحف

خذ لك إجازة شوي

ما قمت عن مكتبك

من يوم كانوا البشر

خلطة تراب ومي

يا شيخ شيبك ظهر

وتطاولوا سنينك

وقزاز نظارتك ظني انهرى تشريخ

يا كاتب التاريخ

شوف القلم وين رايح

حبره من أعمار

هيك القلم يبني دار وهيك يخرب دار

يا عمي ركز بجاه المصطفى المختار

من تحت راس القلم

ما سمعت نوح النوايح

أو أزيز النار

من تحت سن القلم

ماشفت بيت انهدم

ما شفت ساري علم

ماتوا عليه لصغار

ما شفت قبة حرم

تلمع عليها الشمس

وطيور فوق الشجر

تلمس غناها لمس

صارت ملاعب ضباع مكللة بالغار

شوف الجنايز طويلة والنعوش قصار

صوت احتكاك القلم بالورقة ماله همس

تحته شوارع طويلة من دخن وصريخ

يا كاتب التاريخ

يا شيخ شيبك وخط

ما لقيت في شي غلط

في ضجة الملكوت

ما لقيت في شي غلط

في همة التابوت

نظم وقاد المسيرة وعنون الأخبار

بيده كتبها وأذاع النشرة صورة وصوت

ما لقيت في شي غلط

ركض الطفل ع الموت

يتقردن الجندي من فعله فيستأسد

ما لقيت في شي غلط

في شعب كامل جماعة يروح يستشهد

يا شيخ شيبك وخط

جاوب ع هذي فقط

هذا الكتاب اللي واهب كل عمرك ليه

واللي عم يموت شخص بكل كلمة فيه

مين اللي راح يبقى حتي يقرؤه يا شيخ

ويدفع الأجرة ويسدد عرابينك

يا كاتب التاريخ

خبرني شو دينك؟ مساهمة علاء نواف